O P E salye efò lajistis sou dosye Tesse Gary nan nòt pou Laprès.

Obsèvatwa Pou Egalite (O P E) nan yon nòt pou laprès Jedi 18 Jiyè 2024 la, li

ankouraje efò lajistis nan Okay ap fè pou fè limyè sou asasinay animatè patannte emisyon Granlakou sou Lebon Fm nan, nan dènye jou sa yo la.

Li twouve, aksyon kabinè denstriksyon Jean Michelet Séide poze Mèkredi 17 Jiyè 2024 la, li konsidere gen yon gwo pa lajistis nan Okay fè, sou asasinay Animatè Tesse Gary a, lè li rive tande ansyen komisè gouvènman Okay la Ronald Richemond kòm ansyen Otorite ki se pi gwo sispèk nan disparisyon ak asasinay Tesse Gary pi devan.

Li fè remake, anvan sa, lajistis te nan difikilte pou te fè swivi sou dosye Tesse Gary a, akoz Me Ronald Richemond ki te la kòm komisè gouvènman an te konstitiye obstak pou dosye sa te kapab fè pakou li, akoz Ronald Richemond kòm akize nimewo 1 nan asasinay Tesse la, t ap jwe wol jij epati anmen m tan. Sa rive, anpil fwa, kòmisè a, libere sispèk yo ak, arete inonsan, anpeche jij denstriksyon Jourdain ensi koni nan travay li nan mennen dosye sa, nan kòmansman yo. Tout sa, se pou l di, pozisyon Richemond te okipe a, demach la, li depaman ak prensip administratif peyi Ayiti ki klè ou pa kapab jij epati anmenmtan. Ak, li wè, lè se konsa sitiyasyon an prezante, ki kantite dega sa genyen nan bon fonksyonman jistis la.

Pou kounye a, pou mennen dosye sa a, nan bon pò li, li enpòtan pou jij denstriksyon Jean Michelet Séide k ap ankete sou dosye asasinay Tesse la, pou li swiv ak aplike tout sa lalwa tabli kòm prensip, pwosedi pou li pa gaye nan travay l ap fè a. Tankou, nan tande li genyen pou li tande Otorite osinon sivil yo, ak, pou l mete anpratik sa kòd penal Ayisyen an selon atik 380 rive 390 la egzije a.

Answit, jij denstriksyon an dwe mande pou aktyèl komisè gouvènman Okay la, James Jean-Louis ak direktè lapolis Sid la, Daniel Compère pou li desitire osinon dezame kò milis Richemond an ki kontinye ap sikile ak zam anba je popilasyon an, menm Otorite yo tou, jan nou t ap asiste sa nan lè Me Ronald Richemond te gen pou l vin prezante devan kabinè denstriksyon an Mèkredi a. Konsa, li nesesè tout pandan enstriksyon ap rapousib pou Richemond pa lib nan sikilasyon li.

Nan menm demach la toujou, l ap tann pou minis jistis la, Carlos Hercule pwouve li seye, se pa manti l ap bay pèp Sid, limanite ann jeneral, pou l respekte pwomès li yo nan sa li te di li gen pou li fè yo, depi lè li mete Richemond andisponibilite a. Konsa, nan jou sa yo la li dwe fè tout sa ki posib yo pou lajis rive depoze lapat sou tout Otorite osinon moun ki enplike nan touye Tesse Gary a.

Yon lòt bò, popilasyon an dwe rete disponib pou l pataje ak lajistis tout sa li genyen kòm enfòmasyon sou asasinay Animatè patannte emisyon Granlakou sou radyo Lebon Fm nan, Tesse Gary.

Li sèten leve kanpe lajistis Okay sou dosye Tesse Gary a, se p ap gwo van ti lapli. Ni tou, se p ap yon fason pou lave sispèp osinon bouwo yo. Ak tou, sa p ap fini menm jan ak dosye asasinay Jean Léopold Dominigue.

Atansyon! Atansyon! Atansyon! Lajistis, pou sa pa debouche sou jistis popilè.

Jean Claudy Aristil

Direktè